Di Sait Vo Lusérn



21/07/2017
()

SAIBAR NO SICHAR IN ÜNSARNE BELDAR?

Benn i pin gest a tschovìtt pinne hèrta gånt in balt alùmma zo süacha sbemm. I pin gånt pan mòrgas palle, benn ’z iz no gest tunkhl odar daz abas fin az da iz gånt oine di sunn. Dise djar moi muatar, un no pellar moi nona, soin gånt na sbemm un na hennepern fin att di Marké odar in di Brusolada un soin partìrt von lånt di drai mòrgas. Ma hatt gehatt khummana vort zo giana alùmma pan ünsarn beldar. Ma hatt bokhént lai åndre lusérnar, di kentsch un a par fremmege. Di uantzegen sachandar bo da mar håm gemacht di vort soinz gest dar plitzegar un dar nebl: gian zovorlùr nå in tritt von Sambinélo! In ta’ vo haüt iz no asó? Mabar lazzan gian di khindar in balt alùmma? I vorsmar ditza ombrómm ma höart hèrta mearar ren vo per un bölf bo da håm bidar ågeheft zo giana durch pan ünsarn pèrng. Ma hatt gelest artìkln vo pern un bölf bo da håm gevrèzzt esela, khelbar un moflù. In per håmsen gesek vor djar in Vesan, un in bolf nåmp in lånt o! Attn per izta khent khött un geschribet vil: ma boast ke benn ma geat pa balt mochtmaze machan höarn, az ma sek in per mochtma gian vort laise laise redane, åna zo hoka odar zo loava un nia gian inkéng in khlumman von per, di muatar iz hèrta nåmp un magat auspringen zo schütza di djungen. Ma von bolf mochtmase vörtn? Ma vörteze von sèll bo ma nèt khennt. Denna hånne gevorst in an tschell von moi månn, bo da steat nå in gebìllt vor arbat, un att dise vichar boaztarsan gesìchart mearar baz biar. Dar hattmar khött ke di bölf att di ünsarn pèrng soin gerift alùmma von Beleschlånt odar vo dar Slovenia. Dar iz gånt vürsnen zo kontàra ke attn Appennino soinda mearar baz 1500 bölf un ma hatt nia gehöart khön vo laüt bo da soin khent gevrèzzt von bolf. Sichar ma mocht bizzan ke ma hatt zo tüana pitt groaze un starche bille vichar. A per mage rivan zo sbera mearar baz 150 kile, un loaft bahémme azpe a ross un a bolf iz sterchar baz a hunt. Dise vichar vörtnse von mentsch, bo da se hatt hèrta auzgemacht pitt sklöpp, trappln un gift un süachan zo stiana vort bait von laüt. ’Z mage auzvalln ke da nemparnse in haüsar odar in stèll zo süacha eppaz zo vrèzza. Sèmm mochtma nicht tüan, ombrómm da magatn gian kontro in mentsch un paizan zo schützase. Pezzar iz hokn un mèkkn a fånn pittnar khell zo darschrékha daz bill vich. An lestn gloabe iz pezzar nèt lazzan alùmma khlummane khindar auz von lånt, ma pitt allz daz sèll bo ma lest att di fòldje un höart in televisióng, bo da auzvallt in di stattn, gloabe soinda mearar sichar di beldar umme ’z lånt, baz zèrte quartìarn vo Tria. In ta’ vo haüt mochtmase bohüatn mearar von töbegen laüt baz von billn vichar!  

S.F. 


Trentino, Di Sait vo Lusérn, venerdì 21 luglio 2017
SAIBAR NO SICHAR IN ÜNSARNE BELDAR?

CONDIVIDI