Di Sait Vo Lusérn



20/01/2017
()

LUSÉRN: SLEDDOG VOR ALLE

Natale ha portato a Luserna una bella novità: un centro di Sleddog con sede a Millegrobbe. Tiziano si è trasferito con l’intera famiglia da Moncenisio, in Val di Susa per una nuova avventura sul nostro altipiano. In collaborazione con la federazione Italiana Mushers Sleddog Sport, Tiziano e Roberta offrono a tutti, grandi e piccini, molteplici possibilità di approccio ai cani: d’inverno lezioni di guida alla slitta ed escursioni sulla neve, d’estate le proposte si moltiplicano; troviamo quindi escursioni con la classica slitta con ruote, possibilità di far trainare la propria bicicletta o di farsi accompagnare durante una passeggiata o un Nordic Walking da un cane che, attaccato alla cintura, sostiene la camminata. Questa nuova proposta arricchisce sicuramente il ventaglio di opportunità sportive e turistiche del nostro bellissimo altipiano cimbro.

Daz sèll von Tiziano iz a lem hèrta pittar natur un pinn vichar. Er iz gebortet in di Schweiz, in Kantón Ticino, in di sèlln pèrng hattar gelirnt zo raita un iz khent maistro vo ski. Zo lirna pezzar disa arbat izzar gånt viar djar in Canada un sèmm izzarse vortvorlórt vor di hunt un di slitn. Hèrta sèmm izzar gånt ka schual un iz khent Musher, an altz bort boda khint gètt in laüt boda vüarn di slitn gezoget von hunt. Baldar iz khent bodrùmm hattaren någenump an hunt, Nicolai, un pinn sèll hattar ågeheft disa naüge arbat. In biane zait hattar gehatt vünfunachtzekh hunt un iz gånt ummar pa bèlt zo macha ettlane gare o.
’Z djar 2002, pitt soi baibe Roberta, izzar khent in Beleslånt, a Moncenisio in Val vo Susa, un sèmm hattar augemacht an naüng allevamento vo drai nòrdike ratze vo hunt. Sèmm dar Tiziano un di Roberta håm gehatt zboa khindar, ma ’z lem bosa håm gelebet iz gest próprio malaméntar: sa håm gehatt zo macha an ur bege zo riva in lånt un pan lång un khalt bintar balz ’z hatt gesnibet håmsa hèrta gemocht nützan di motoslitta zo mövrase. Balda di khindar soin khent groaz un håm gemocht gian ka schual disa situatzióng iz khent kartza malaméntar un iz alòra bosa håm auzgemacht zo giana vort. Ka herbest di Federatzióng von Mushers, in kompanja von Kamou vo Lusérn un vo Lavròu, hatt gesüacht apparùmmaz auzolega a schual vo sleddog in Milegrùam. Asó dar Tiziano un di Roberta, in kompanja pinn khindar soin gerift atz Lusérn. Zo prenga da allz bazza håm mengl un alle di simunvürtzekh hunt iz nèt gest asó dèstar umbrómm ’z izta gest biane zait un tausankh kilòmetre bege zo macha, alle di vert. Ma, pitt vil patziéntza un no mearar arbat, håmzaz dartånt zo smontàra alle di haüsla sèm a Moncenisio un zo machase bidar au in Pon vo Milegrùam. Est izta a schümmadar allevamento vo hunt zo maga gian ’z sega un ’z spilada pittnåndar. 
Balda bart khemmen dar snea bartnsa soin boróatet zo lirna in khindarn obar di sèkhs djar un in laüt boda soin interesàrt zo vüara di slitn pinn hunt. Pan summar, anvetzte, bartma mang gian pinn slitn pinn rodln odar machanse ziang gianante pinn rat odar zo vuaz o.
Disa iz sichar a schümmana naüga realtà un okasióng vor da Zimbar Hoachebene: dar Tiziano un di Roberta soin kontént ’z stiana atz Lusérn un zo maga machan soi arbat in ünsarne beldar.

Daniel von Polèz

 

Trentino, Di Sait vo Lusérn, venerdì 20 gennaio 2017
LUSÉRN: SLEDDOG VOR ALLE

CONDIVIDI